اسلام آباد (مانیٹرنگ ڈیسک)چیئرمین پی ٹی آئی عمران خان نجی کمپنی کے طیارے پر عمرہ کی ادائیگی کیلئے سعودی عرب گئے  جس کا فی گھنٹہ سفر کا کرایہ 8 لاکھ روپے ہے ۔نجی ٹی وی جیو نیوز کے مطابق عمران خان نجی کمپنی ’’رینسلے جیٹ ‘‘کا چیلنجر604 طیارہ چارٹر کر کے سعودی عرب عمرہ کی ادائیگی کیلئے گئے ہیں جس کے فی گھنٹہ سفر کا کرایہ 8 لاکھ روپے ہے اور اس میں دس نشستیں ہوتی ہیں،

واضح رہے کہ عمران خان کے ہوائی سفر کا آغاز اسلام آباد سے ہوا ، طیارہ پہلے اسلا م آباد سے لاہور گیا جہاں ان کے اہل خانہ کو لے کر واپس اسلام آبادآیا اور پھر وہاں سے عمران خان مدینہ کیلئے روانہ ہوئے ۔ عمران خان  آج  عمرہ کی ادائیگی کیلئے مدینہ سے جدہ جائیں گے اور اسی روز اسلام آباد واپس آئیں گے ۔ عمران خا ن کا مجموعی ہوائی سفر 13 گھنٹوں پر مشتمل ہو گا اور اس کا خرچہ ایک کروڑ سے زائد ہو گا ۔واضح رہے کہ عمران خان کے ہمراہ زلفی بخاری بھی ہیں ۔دوسری جانب ادھرنگران وزیر اعظم جسٹس (ر)ناصر الملک نے زلفی بخاری کا نام ای سی ایل سے نکالنے کے معاملے پر وزارت داخلہ سے رپورٹ طلب کر لی ہے۔ترجمان وزیراعظم ہائوس کے مطابق نگران وزیر اعظم جسٹس (ر)ناصر الملک نے عمران خان کے قریبی دوست زلفی بخاری کا نام ای سی ایل سے نکال کر عمرہ کی ادائیگی کیلئے جانے کی اجازت دینے کے معاملے کا نوٹس لے لیا اور انہوں نے وزارت داخلہ سے رپورٹ طلب کرلی ہے۔ خیال رہے کہ پیر کے روز چیئرمین تحریک انصاف عمران خان اپنی اہلیہ کے ہمراہ ادائیگی عمرہ کے لئے اسلام آباد ایئرپورٹ   پر پہنچے تو زلفی بخاری بھی ان کے ساتھ تھے۔ ایف آئی اے نے زلفی بخاری کو جہاز میں سوار ہو نے سے روک دیا اور بتایا کہ ان کا نام ای سی ایل میں ہے وہ نہیں جاسکتے۔ میڈیا رپورٹس کے مطابق عمران خان نے مبینہ طور پر فون پر کسی بالا شخصیت سے بات کی جس کے بعد زلفی بخاری کو طیارے میں جانے کی اجازت دے دی گئی تھی۔