اسلام آباد(مانیٹرنگ ڈیسک ) مسلم لیگ ن ہاؤس اسلام آباد پر کارکنوں نے قبضہ کرلیا، ایف ایٹ میں واقع مرکزی سیکریٹریٹ میں اسلام آباد کی نشستوں پر انٹرویو رکھے گئے تھے۔تفصیلات کے مطابق اسلام آباد کی نشستوں پر انٹرویو کے لیے آئے کارکنوں نے مسلم لیگ ن ہاؤس اسلام آباد پر قبضہ کرلیا، امیدواروں سے انٹرویو مشاہد اللہ اور ڈاکٹر طارق فضل چوہدری نے کرنے تھے۔
ن لیگ کے کارکنان نے سیکریٹریٹ پر قبضہ کرنے کے بعد نعرے بازی کی اور طارق فضل چوہدری کے خلاف نعرے لگائے، بعدازاں بیرسٹر ظفر اللہ، طارق فضل چوہدری ودیگر رہنما مسلم لیگ ہاؤس پہنچے۔مشاہد حسین سید کے مسلم لیگ ن کے ناراض کارکنوں سے مذاکرات ہوئے، مشاہد حسین سید سے کامیاب مذاکرات کے بعد ناراض کارکنوں نے مسلم لیگ ہاؤس خالی کردیا، طارق فضل چوہدری کا کہنا تھا کہ پارٹی ٹکٹ دینا پارلیمانی بورڈ کا کام ہے، پارٹی جس کو چاہے ٹکٹ دے ہم اس کا ساتھ دیں گے۔
