اسلام آباد(مانیٹرنگ ڈیسک)پاکستان تحریک انصاف کے رہنما علی محمد خان نے کہا ہے کہ ان کے حلقے میں پارٹی سروے کررہی ہے اس لئے ان کو ٹکٹ جاری نہیں ہوا۔ امید ہے کہ عمران خان میرٹ پر فیصلہ دیں گے ۔انہوں نے مزید کہا کہ چیئرمین پاکستان تحریک انصاف عمران خان پارٹی میں شامل ہونے والے نئے سیاستدانوں کو بھی ٹکٹ دینے کے حق میں ہیں۔
ادھر مسلم لیگ ن کے رہنما میاں جاوید لطیف نے علی محمد خان کو بڑی پیشکش کرتے ہوئے کہا ہے کہ اگر تحریک انصاف کی جانب سے ٹکٹ نہ ملنے پر علی محمد خان آزاد حیثیت میں عام انتخابات میں حصہ لیں تو میں مسلم لیگ ن کی قیادت سے درخواست کروں گا کہ علی محمد خان کے مقابل لیگی امیدوار کھڑا نہ کیا جائے۔دوسری جانب تحریک انصاف کے رہنما علی زیدی نے کہا ہے کہ پی ٹی آئی رہنما علی محمد خان کو ٹکٹ جاری کر دیا جائے گا۔ان کو ٹکٹ جاری کرنے کے حوالے سے کچھ مسائل ہیں جو جلد حل کر لئے جائینگے۔
