اسلام آباد (یوا ین پی)پیپلزپارٹی کے سینیٹر رحمان ملک کو سپریم کورٹ میں اونچی آواز میں بات کرنا مہنگا پڑ گیا۔ عدالت نے توہین عدالت کا نوٹس جاری کر دیا تاہم غیرمشروط معافی مانگنے پر واپس لے لیا۔سپریم کورٹ میں رحمان ملک کے خلاف تنخواہوں اور مراعات کی واپسی کے کیس کی سماعت ہوئی جس کے دوران رحمان ملک نے درخواست گزار محمود اخترنقوی کو بلیک میلر کہا تو انہوں نے الزام کے ثبوت دینے کا مطالبہ کیا۔
بحث و تکرار میں دونوں کی آواز اونچی ہوگئی تو بنچ نے انہیں توہین عدالت کے نوٹس جاری کر دیئے۔چیف جسٹس نے رحمان ملک سے کہا آپ وزیر اور سینیٹر رہے ہیں، عدالت میں کیا اس طرح بات کرتے ہیں۔ رحمان ملک اور محمود اختر نقوی نے غیرمشروط معافی مانگی تو عدالت نے نوٹس واپس لے لئے۔چیف جسٹس نے ریمارکس دیتے ہوئے کہا کہ رحمان ملک سے دوہری شہریت پر تنخواہ اور مراعات کی واپسی کے حکم پر من و عن عمل ہوگا.
