اسلام آباد (مانیٹرنگ ڈیسک) ڈاکٹر فردوس عاشق اعوان نے اپنے ایک ویڈیو بیان میں کہا کہ ن لیگ میں شمولیت کی خبر سو فیصد غلط ہے، یہ بالکل بے بنیاد، مضحکہ خیز ہے، حقیقت کے برعکس ہے اور میں اسے شرمناک قرار دوں گی، یہ ن لیگ کے پٹواریوں کا گھٹیا پن ہے جو میرے نام سے بے بنیاد خبر بنا کر سوشل میڈیا پر چلا رہے ہیں۔

فردوس عاشق اعوان نے کہا کہ میں ن لیگ کے سیاسی تابوت میں کیل ٹھونکنے کے لیے اپنے حلقے میں دن رات کام کر رہی ہوں۔ انہوں نے کہا کہ میں مقامی، قومی اور بین الاقوامی میڈیا پر اس حکومت کی بیڈ گورننس، ملک دشمن اقدامات کو جس طرح سے ہر سطح پر عوام کی نمائندگی کرتے ہوئے پیش کر رہی ہوں، یہ کیسے ممکن ہے کہ میں اس جماعت کے ساتھ ہاتھ ملا لوں یا اس جماعت کے ساتھ سیاسی رفاقت کا فیصلہ کر لوں یا وہ جماعت جس نے پاکستان کو دیمک کی طرح چاٹ لیا، جس کی لیڈر شپ نے پاکستان کو کنگال کر دیا اور جس کی قیادت نے پاکستان کو دنیا بھر میں بھکاری بنا دیا، جس کی قیادت نے اداروں کو گھر کی لونڈی سمجھتے ہوئے یرغمال بنا کے جس من پسند انداز سے ان کو ڈکٹیشن دینے کی کوشش کی اور جب انہوں نے ڈکٹیشن لینے کی بجائے آئین اور قانون کے تحت اس خاندان اور جماعت کے لیڈرز کے خلاف فیصلے دیے تو وہ جماعت یہ واویلا کرے، پروپیگنڈا کرے کہ عدلیہ یا افواج پاکستان یا ملکی سلامتی کے ادارے ان کے خلاف سازش کر رہے ہیں، میڈیا سے بات چیت کرتے ہوئے پاکستان تحریک انصاف کی مرکزی رہنما ڈاکٹر فردوس عاشق اعوان نے کہا کہ ن لیگ ہمیشہ عدلیہ اور قومی و سلامتی اداروں کے خلاف سازش کرتی رہی ہے۔ن لیگ کے ساتھ میرا نظریہ اور سوچ نہیں ملتی۔

ن لیگ نے سیاست کو روزگار اور کاروبار سمجھا ہے۔پی ٹی آئی کی کارکن ہوتے ہوئے کیسے ممکن ہے کہ میں مافیا کا حصہ بنوں۔ڈاکٹر فردوس عاشق نے کہا کہ میرے سیاسی حریف اور ن لیگ میرے خلاف سازشیں کر رہی ہے۔میرے خلاف ن لیگ میں جانے کی جھوٹی خبریں لگانے اور سوشل میڈیا پر وائرل کرنے والوں کے خلاف عدالت جاؤں گی۔

موضوعات:ڈاکٹر فردوس عاشق اعوان