اسلام آباد(سی پی پی) راولپنڈی سے نارووال جانے والی مسافر بس گوجر خان کے قریب حادثے کا شکار ہو گئی،11افراد جاں بحق اور 27سے زائد زخمی ہو گئے۔ریسکیو ذرائع کے مطابق جی ٹی روڈ پر بائی خان پل کے قریب ٹرک کو اوورٹیک کرتے ہوئے مسافر بس حادثے کا شکار ہو گئی جس کے نتیجے میں ابتدائی طور پر 4 افراد موقع پر جاں بحق اور 30 سے زائد زخمی ہوئے۔
ریسکیو حکام کے مطابق جاں بحق ہونے والوں میں بچے اور خواتین بھی شامل ہیں۔ حادثے میں جاں بحق ہونے والوں کی میتیں اور زخمی ہونے والوں کو تحصیل ہیڈ کوارٹر ہسپتال گوجر خان منتقل کر دیا گیا ہے، جہاں مزید 7 افراد دم توڑ گئے جبکہ 27 زخمیوں کو طبی امداد فراہم کی جا رہی ہے۔ریسکیو ذرائع کے مطابق حادثے میں زخمی اور جاں بحق ہونے والوں کا تعلق پنجاب کے ضلع نارووال سے ہے۔
