اسلام آباد(مانیٹرنگ ڈیسک)پاکستان کے قبائلی علاقے کی اورکزئی ایجنسی میں بم دھماکہ، ایک شخص جاں بحق، 2زخمی۔ تفصیلات کے مطابق پاکستان کے قبائلی علاقے کی اورکزئی ایجنسی میں بم دھماکہ کے نتیجے میں ایک شخص جاں بحق جبکہ دو زخمی ہو گئے ہیں۔ ابتدائی اطلاعات کے مطابق دھماکہ ریموٹ کنٹرول کے ذریعے کیا گیا۔ دھماکے کی اطلاع ملتے ہی سکیورٹی فورسز کے دستے جائے وقوعہ پر پہنچ گئے ہیں

اور علاقے کو گھیرے میں لے کر سرچ آپریشن شروع کر دیا گیا ہے۔ دھماکے کے بعد امدادی کارروائیاں بھی جاری ہیں اور ریسکیو اہلکار امدادی کارروائیوں میں مصروف ہیں۔ واضح رہے کہ پاکستان میں دہشتگردی کی نئی لہر محسوس کی جا رہی ہے گزشتہ روز کوئٹہ میں سریاب روڈ پر نامعلوم مسلح ملزمان نے سکیورٹی فورسز کی گاڑی پر فائرنگ کی جس کے نتیجے میں 4سکیورٹی اہلکار شہید ہو گئے تھے۔