لاہور(آن لائن) وزیراعلیٰ پنجاب میاں شہباز شریف سعودی عرب کا6 روزہ دورہ مکمل کرنے کے بعد واپس لاہور پہنچ گئے وزیراعلیٰ پنجاب میاں شہباز شریف خصوصی طیارے کے ذریعے سعودی عرب سے واپس لاہور پہنچے دورہ سعودی عرب کے دوران وزیراعلیٰ پنجاب نے سعودی ولی عہد محمد بن سلمان اور دیگراعلیٰ حکام سے اہم ملاقاتیں کیں اور انہوں نے عمرہ کی سعادت حاصل کی اور ملکی سلامتی وترقی کیلئے خصوصی دعا کی واضح رہے

کہ و زیراعلیٰ پنجاب میاں شہباز شریف اچانک خصوصی طیارے کے ذریعے 27 دسمبر کو سعودی عرب کے دورے پر گئے تھے ،وزیراعلیٰ پنجاب کے اچانک دورے کے حوالے سے ملک میں بہت سی باتیں زیر بحث رہیں جبکہ دوسری طرف وزیراعلیٰ پنجاب نے لاہور ائیرپورٹ پر لینڈ کرتے ہی اپنی سرکاری مصروفیات کا آغازکر دیا وہ اپنے ائیرپورٹ سے سیدھا پاکستان کڈنی اینڈ لیور ٹرانسپلانٹ ہسپتال گئے جہاں انہوں نے ہسپتال کے فیز ون کے حوالے سے تعمیراتی کاموں کا جائزہ لیا اس موقع پر وزیراعلیٰ پنجاب کا کہنا تھا کہ وہ سعودی حکومت کی دعوت پر عمرہ کی ادائیگی کیلئے سعودی عرب گئے تھے ان کا یہ بھی کہنا تھا کہ سعودی عرب ہمارا بہترین دوست ہے ہم پر اندھا اعتماد کرتا ہے سعودی عرب نے ہر مشکل وقت میں ہمارا ساتھ دیا انہوں نے مختلف سوالوں کا جواب دیتے ہوئے کہا کہ پاکستان کڈنی اینڈ لیورٹرانسپلانٹ ہسپتال کا باقی ماندہ کام 23 مارچ تک مکمل کرلیا جائیگا جبکہ فروری کے مہینے میں لیور کی سرجری کا عمل بھی شروع کر دیا جائیگا انہوں نے کہا کہ پاکستان بھر سے لیورو گردوں کی بیماری میں مبتلا پاکستانی اپنا علاج کروا سکیں گے جبکہ پاکستان بھر سے مستحق مریضوں کا اس ہسپتال میں مفت علاج کیا جائیگا۔