کوئٹہ (آئی این پی )بلوچستان متحدہ محاذ کے وائس چیئرمین شمس مینگل نے بھارتی جاسوس کلبھوشن یادیو سے ان کی والدہ اور اہلیہ کی ملاقات اور میڈیا پر کوریج دینے پر وفاقی وزرائے خارجہ و داخلہ اور متعلقہ محکموں کے سیکرٹریز کے خلاف مقدمہ کے اندراج کے لئے تھانہ سٹی کوئٹہ میں درخواست دائر کردی
تاہم ڈیوٹی پر موجود پولیس کی جانب سے محکمے کے اعلیٰ حکام کو درخواست دینے اور ان سے مشاورت کرنے اور ان کے احکامات کی روشنی میں کوئی فیصلہ کرنے کا کہا گیاجس پر بی ایم ایم کی جانب سے سٹی تھانہ کے باہراحتجاجی مظاہرہ کیا گیا ۔ گزشتہ روز شمس مینگل اور بی ایم ایم کے عہدیداران سٹی تھانہ کوئٹہ پہنچے اور پارٹی پیڈ پر لکھی گئی درخواست پیش کی جس میں موقف اختیار کیا گیا ہے کہ کلبھوشن یادیو انڈین جاسوس اور معصوم پاکستانیوں کو دہشت گردی کا نشانہ بنانے کا ذمہ دار ہے لیکن فارن آفس نے گزشتہ روز اس کی اہلیہ اور ماں سے ملاقات کروائی بلکہ الیکٹرانک میڈیا پر اس کی بھر پور کوریج بھی کی گئی جو خلاف قانون ہے ۔ انہوں نے موقف اختیارکیا ہے کہ دفتر خارجہ اور دیگر حکومتی عہدیداران نے دہشت گرد کو سہولت دی ہے جو دہشت گردی کے زمرے میں آتا ہے بلکہ اس سے دہشت گردی کو بھی فروغ ملے گا اس لئے وفاقی وزرائے خارجہ و داخلہ اور سیکرٹری داخلہ و خارجہ کے خلاف ایف آئی آر درج کرکے کاروائی کی جائے ۔ پولیس کی جانب سے درخواست وصول کرنے کے بعد درخواست گزار کو بتایا گیا کہ اس سلسلے میں وہ ڈی آئی جی پولیس کو درخواست دیں وہاں سے انہیں احکامات ملے گی تو وہ ایف آئی آر چاق کریں گے یا پھر اس سلسلے میں وہ اعلیٰ حکام سے مشاورت کے بعد کوئی فیصلہ کریں گے ۔
