اسلام آباد (مانیٹرنگ ڈیسک)ایک ماہ میں گورنمنٹ گرلزسرسید کالج گجرات سے ایک ماہ کے دوران 6 طالبات غائب ، تفصیلات کے مطابق ایک نجی ٹی وی چینل کی رپورٹ کے مطابق یہ کالج ریلوے روڈ پر واقع ہے، دو روز قبل پھلروان سے تعلق رکھنے والی فرسٹ ائیر کی طالبہ

نروسہ بھی غائب ہو چکی ہے جس کا ابھی تک کچھ پتہ نہیں چل سکا، سرسید کالج کی طالبہ نروسہ کے والدین سخت پریشان ہیں انہوں نے اعلیٰ حکام سے بیٹی بازیاب کرانے کا مطالبہ کیا ہے اوردیگر بچیوں کو بھی بازیاب کروانے کامطالبہ کیا ہے۔نجی ٹی وی کا کہنا ہے کہ اب تک غائب ہونے والی لڑکیوں میں نروسہ کے علاوہ نرجس، اقرا، ستارہ نورین ، راضیہ گلشن زمان بھی شامل ہیں، جب کالج کی پرنسپل سے رابطہ کیا گیا تو انہوں نے سکرین پر آنے سے انکار کر دیا ، وہ خود شدید پریشان ہیں ان کا کہنا ہے کہ ہم خود پریشان ہیں کہ ایک ماہ میں چھ بچیاں گورنمنٹ کالج سے اغوا ہوئی ہیں، ورثا کا یہ بھی کہنا ہے کہ ہمیں بچیوں کے غائب ہو جانے کے بعداب تک کسی قسم کی کوئی کال موصول نہیں ہوئی ہے، نہ ان بچیوں کا پتہ چلا ہے کہ وہ کہاں ہیں؟ نجی ٹی وی چینل کے مطابق کالج میں سی سی ٹی وی کیمرے بھی نہیں لگائے گئے ہیں۔ بچیوں کے والدین سخت ذہنی اذیت اور پریشانی کا شکار ہیں ، پولیس ان بچیوں کو تلاش کرنے کی کوشش میں مصروف ہے مگر تاحال کوئی کامیابی حاصل نہیں ہو سکی ہے۔