اسلام آباد(مانیٹرنگ ڈیسک)نواز شریف اور مریم نواز لندن سے وطن واپس پہنچ گئے، لندن سے وطن روانہ ہونے سے قبل عمران خان نا اہلی کیس کے فیصلے کو دوہرا معیارقرار دیتے ہوئے تحریک چلانے کا اعلان کر دیا۔ تفصیلات کے مطابق نواز شریف اور مریم نواز لندن سے وطن واپس پہنچ گئے ہیں ۔ سابق وزیراعظم اپنی بیٹی کے ہمراہ لندن سے پی آئی اے کی پروازپی کے 758 سے لاہورپہنچے۔نواز شریف ایک روز آرام کے بعد پارٹی رہنماؤں کا اجلاس بلائیں گے،
جس میں عمران خان اور جہانگیرترین سے متعلق سپریم کورٹ کے فیصلوں سمیت مختلف امور پر بات چیت کریں گے جب کہ منگل کو وہ احتساب عدالت میں بھی پیش ہوں گے۔ہیتھرو ائیرپورٹ پر میڈیا نمائندوں سے گفتگو کرتے ہوئے نواز شریف نے عمران خان نا اہلی کیس کے حوالے سے بات کرتے ہوئے کہا کہ انصاف کے دو ترازوں نہیں چلیں گے، عمران خان نااہلی کیس میں جوعدالتی فیصلہ آیا وہ خود بول رہا ہے کہ اس طرح کا انصاف نہیں چلےگا جب کہ اس کے خلاف تحریک چلائیں گے۔
