اسلام آباد (مانیٹرنگ ڈیسک) آئین سے ختم نبوت ؐ سے متعلق شق نکالے جانے اور ذمہ داروں کا تعین نہ کئے جانے کے معاملے پر احتجاج کرنے والی مذہبی جماعتوں نے ایک مرتبہ پھر دھرنا ختم کرنے سے انکار کرتے ہوئے سپریم کورٹ سے از خود نوٹس لینے کی درخواست کر دی جبکہ دوسری جانب انتظامیہ کی
جانب سے تنبیہ کے بعد ممکنہ آپریشن کامقابلہ کرنے کیلئے دینی مدارس کے ہزاروں طلباء فیض آباد پہنچ گئے ۔تفصیلات کے مطابق جمعہ کو اسلام آباد ہائی کورٹ کے جج شوکت عزیز صدیقی نے شہری کی طرف سے دائر کی جانے والی درخواست کی سماعت کرتے ہوئے انتظامیہ کو حکم دیا کہ وہ ہر حال میں ہفتہ کی صبح دس بجے تک مذہبی جماعتوں کا دھرنا ختم کروا کر راستے صاف کروایں۔مذہبی جماعتوں نے عدالتی حکم پر رد عمل دیتے ہوئے ایک مرتبہ پھر دھرنا نہ ختم کرنے کا اعلان کرتے ہوئے کہا کہ عدالت نے ہمارا موقف سنے بغیر حکم دیا سپریم کورٹ از خود نوٹس لیکر ہمارا موقف سنے۔ دوسری جانب جڑواں شہروں سے تحریک لبیک یا رسول اللہ کے حامی دینی مدارس کے ہزاروں طلبہ لاٹھیوں ، پتھروں کے ہمراہ دھرنے والی جگہ پہنچ گئے ۔ ذرائع کے مطابق راولپنڈی میں مفتی حنیف قریشی کی سربراہی میں جمعہ کے روز اجلاس منعقدکیا گیا جس میں دھرنے کے شرکاء کے ساتھ اظہار یکجہتی کیا گیا۔ دوسری جانب پیر حسین الڈین شاہ نے بھی دھرنے کے شرکا ء کے ساتھ یکجہتی کا اظہار کرتے ہوئے حکومت سے کہاکہ وہ تمام معاملات افہام و تفہیم کے ساتھ طے کرے۔
