اسلام آباد(مانیٹرنگ ڈیسک )پاکستان پیپلزپارٹی نے خیبرپختونخواہ میں مسلم لیگ (ن) کی وکٹ گرادی،مسلم لیگ (ن) کے سابق ضلع ناظم نوشہرہ داؤدخان خٹک نے پیپلزپارٹی میں شمولیت کا اعلان کردیا،چیئرمین پیپلز پارٹی بلاول بھٹوزرداری نے ان کی پارٹی میں شمولیت کا خیرمقدم کیا ہے۔ نجی ٹی وی کے مطابق پیپلزپارٹی کے چیئرمین بلاول بھٹو زرداری سے مسلم لیگ( ن )کے سابق ضلع ناظم نوشہرہ داؤد خان خٹک نے ملاقات کی۔
جس میں ملک کی سیاسی صورتحال پرتبادلہ خیال کیا گیا۔ اس موقع پر داؤد خان خٹک نے بلاول بھٹوکی قیادت پراعتماد کا اظہارکرتے ہوئے پیپلزپارٹی میں شمولیت کا اعلان کیا۔تاہم سابق ضلع ناظم نوشہرہ داؤد خان خٹک کی شمولیت کا باقاعدہ اعلان آج پشاور میں بلاول بھٹوکے عوامی جلسے میں بھی کیا جائے گا۔واضح رہے کہ پیپلزپارٹی آج پشاور میں عوامی طاقت کا مظاہرہ کریگی جس کیلئے پنڈال تیار کر لیا گیا ہے۔
