اسلام آباد(آن لائن) نیب نے کیپٹن (ر)صفدر کی گرفتاری میں رکاوٹ ڈالنے پر وزرا اور ن لیگی کارکنوں کے خلاف قانونی کارروائی کا فیصلہ کیا ہے۔ ذرائع کے مطابق نیب نے گزشتہ رات کیپٹن (ر)صفدر کی گرفتاری میں رکاوٹ ڈالنے پر وزرا اور لیگی کارکنوں کے خلاف قانونی کارروائی کا فیصلہ کیا ہے، اسلام آباد ایئرپورٹ پر کیپٹن صفدر کی گرفتاری میں رکاوٹ ڈالنے والوں کے خلاف کارروائی ہوگی اور نیب گاڑیوں کو نقصان پہنچانے
پر ایف آئی آر درج کرائے گا۔واضح رہے کہ رات گئے کیپٹن ریٹائرڈ صفدر عباسی اہلیہ مریم نواز کے ہمراہ لندن سے براستہ دوحہ اسلام آباد ایئرپورٹ پہنچے جہاں مسلم لیگ(ن)کے کارکنوں کی جانب سے کیپٹن صفدر کی گرفتاری کے خلاف مزاحمت کی گئی اور کارکن نیب کی گاڑی کے آگے لیٹ گئے جب کہ گاڑی پر مکے بھی مارے۔دریں اثناء میاں نواز شریف کی صاحب زادی مریم نواز نے کہا ہے کہ مخالفین کہتے ہیں کہ ایک آتا ہے دوسرا جاتا ہے ہم آتے تو ہیں بھاگتے تو نہیں ۔ تفصیلات کے مطابق مریم نواز نے پیر کے روز نیب عدالت پیشی کے بعد ٹوئٹر پر مخالفین پر کڑی تنقید کرتے ہوئے کہا ہے کہ ہم عدالتوں میں پیش تو ہوتے ہیں جو کہتے ہیں کہ ایک آتا ہے دوسرابھاگ جاتا ہے کم از کم آتے تو ہیں باقی اشتہاریوں کی طرح عدالتوں سے بھاگتے تو نہیں ۔
