راولپنڈی( آئی این پی ) بھارتی فوج کی لائن آف کنٹرول پر بلا اشتعال فائرنگ سے فوجی جوان اور خاتون سمیت 2 افراد شہید جب کہ 3 فوجیوں سمیت 4 زخمی ہو گئے، پاک فوج نے دشمن کو منہ توڑجواب دیا جس سے بھارتی فوجیوں کی ہلاکت کی اطلاعات ہیں ۔ جمعہ کو پاک فوج کے شعبہ تعلقات عامہ ( آئی ایس پی آر) کے مطابق بھارتی فوج نے لائن آف کنٹرول پر رکھ چکری اور راولا کوٹ میں شہری آبادی کو بلا اشتعال فائرنگ کا نشانہ بنایا ۔

بھارتی فوج کی بلا اشتعمال فائرنگ سے ایک خاتون سمیت دو شہری شہید جب کہ 1 زخمی ہو گیا ۔ آئی ایس پی آر کے مطابق بھارتی فوج نے لائن آف کنٹرول پر بھاری اسلحہ کا استعمال کیا ۔ سویلین شہری آبادی کو منتقل کرنے کے دوران فوجی پٹرولنگ پارٹی بھی بھارتی فوج کی فائرنگ کی زد میں آگئی جس کے نتیجے میں نائب صوبیدار ندیم شہید جب کہ 3 فوجی زخمی ہو گئے ۔ پاکستانی مسلح افواج کی جانب سے بھارتی فائرنگ کا موثر جواب دیا گیا جس پر بھارتی فوجیوں کی ہلاکت کی اطلاعات ہیں ۔