اسلام آباد (مانیٹرنگ ڈیسک) جماعت اسلامی کی کال پر میانمار حکومت کے خلاف احتجاجی ریلی نکالی گئی جس میں تاجرتنظیموں اور وکلاء نے بھی شرکت کی، تفصیلات کے مطابق اسلام آباد میں میانمار حکومت کے خلاف احتجاجی ریلیاں سرینا چوک پہنچ گئیں، سرینا چوک پہنچ کر مظاہرین پولیس کی طرف سے لگائی گئی خاردار تاریں ہٹا کر ریڈ زون میں داخل ہونے کی کوشش کر رہے ہیں۔ واضح رہے کہ آج وفاقی دارالحکومت میں میانمار حکومت کے روہنگیا مسلمانوں پر تشدد کے خلاف مظاہرے جاری ہیں۔ احتجاجی ریلیاں سرینا چوک
پہنچ چکی ہیں۔ یہ چھوٹی چھوٹی ریلیاں اب ایک بڑی ریلی کی شکل اختیار کر چکی ہیں اور اس میں جماعت اسلامی کے کارکنان، وکلاء اور تاجر تنظیموں کے نمائندے شامل ہیں۔ مظاہرین نے سرینا چوک پہنچ کر خاردار تاریں ہٹانا شروع کر دی ہیں تا کہ ریڈ زون میں میانمار سفارت خانے تک پہنچا جا سکے۔ خاردار تاریں ہٹانے کے معاملے پر لاٹھیوں سے لیس مظاہرین اور پولیس میں ہاتھا پائی ہو گئی۔ مظاہرین نے کہا ہے کہ وہ ہر قسم کی رکاوٹ عبور کرتے ہوئے میانمار کے سفارتخانے پہنچیں گے، اس وجہ سے وہاں ماحول کشیدہ ہو گیا ہے۔
