اسلام آباد (این این آئی)آل پاکستان مسلم لیگ کے چیئرمین سید پرویز مشرف اور سیکرٹری جنرل ڈاکٹر محمد امجد نے عیدالاضحی کے موقع پر قوم کے نام اپنے مشترکہ پیغام میں کہا ہے کہ قربانی کے فلسفہ کو سمجھ کر اس کی روح پر عمل کرنے سے ایک عظیم معاشرہ قائم کیاجاسکتا ہے۔ عیدِ قربان کے موقع پر مستحق افراد کو اپنی خوشیوں میں شریک کر کے عید کی حقیقی مسرتیں حاصل کی جاسکتی ہیں۔
ان خیالات کا اظہار انہوں نے عیدالاضحی کے موقع پر قوم کے نام اپنے پیغام میں کیا۔ انہوں نے قوم کو عید کی مبارکباد پیش کرتے ہوئے کہا کہ اس موقع پر مستحق افراد کو اپنی خوشیوں میں شامل کیا جائے اور قربانی کے حقیقی فلسفے پر عمل کیا جائے۔ اس طرح سے ایک عظیم معاشرے کے قیام کا خواب شرمندہ تعبیر ہوسکتا ہے۔ انہوں نے کہا کہ اس وقت قوم نازک دور سے گزررہی ہے۔ ہمیں آج کے دن تدبر کے ساتھ اس بحران سے نکلنے کا عہد کرنا ہوگا۔دنیا میں قابل فخر مقام حاصل کرنے کے لئے سب سے پہلے پاکستان کے نظرئیے پر عمل کرنا ہوگا۔ ہم سب کا وجود پاکستان کے وجود ہی سے ممکن ہے اس لئے پاکستان کے مفاد کو ترجیحات کی فہرست میں سب سے اوپر رکھنا ہوگا۔ انہوں نے قوم سے اپیل کی کہ ملک و ملت کی ترقی کے لئے عید کے موقع پر خصوصی دعا کریں۔ اے پی ایم ایل کی مرکزی قیادت نے کراچی میں بارشوں سے ہونیوالی تباہی اور جانی و مالی نقصان پر افسوس کا اظہار کرتے ہوئے کہا کہ ہم متاثرہ خاندانوں کے غم میں برابر کے شریک ہیں۔ انہوں نے کہا کہ عیدِ قربان کے موقع پر مستحق افراد کو اپنی خوشیوں میں شریک کر کے عید کی حقیقی مسرتیں حاصل کی جاسکتی ہیں۔
