اسلام آباد (مانیٹرنگ ڈیسک) سابق وزیراعظم نواز شریف مسلسل عدلیہ کے خلاف اپنی تقاریر میں کچھ نہ کچھ بول جاتے ہیں، اس کے نتیجے میں سابق وزیراعظم نواز شریف کے خلاف لاہور ہائیکورٹ میں ایک اور توہین عدالت کی درخوست دائر کر دی گئی ہے۔ لاہور ہائیکورٹ میں دائر کی گئی توہین عدالت کی درخواست میں موقف اختیار کیا گیا ہے کہ نواز شریف نے ایوان اقبال میں وکلاء
سے خطاب میں پاناما فیصلے پر تنقید کی اور اس کے علاوہ سابق وزیراعظم نواز شریف نے پاناما فیصلے کو انصاف کے برعکس قرار دیا اور سپریم کورٹ کے اس فیصلے پر بارہ سوالات بھی اٹھائے۔ درخواست گزار نے اپنی درخواست میں موقف اختیار کیا کہ نواز شریف کا بیان توہین عدالت کے زمرے میں آتا ہے اس لیے ان کے خلاف توہین عدالت کی کارروائی عمل میں لائی جائے۔
