اسلام آباد (این این آئی)الیکشن کمیشن نے پاکستان تحریک انصاف کے سربراہ عمران خان ٗعوامی مسلم لیگ کے سربراہ شیخ رشید اور ڈاکٹر طاہرالقادری کی نااہلی کیلئے دائر درخواست خارج کردی جبکہ وفاقی وزیر پرویز ملک کے خلاف انتخابی ضابطہ اخلاق کی خلاف ورزی کی درخواست بھی نمٹا دی گئی۔ پیر کو الیکشن کمیشن آف پاکستان میں درخواست گزار شاہ جہاں کی جانب سے چیئرمین تحریک انصاف عمران خان ٗسربراہ عوامی مسلم لیگ شیخ رشید اورپاکستان عوامی تحریک کے سربراہ
ڈاکٹر طاہرالقادری کی نااہلی کے لیے درخواست دائر کی گئی تھی۔درخواست گزار کا موقف تھا کہ تینوں فریقین نے 2002 کے کاغذات نامزدگی میں درست حقائق نہیں بتائے جس بنا پر انہیں نااہل قراردیا جائے۔الیکشن کمیشن نے ابتدائی سماعت کی تو درخواست گزار ہی کمیشن کے روبرو اپنی موقف کے دفاع کیلئے پیش نہ ہوئے جس پر کمیشن نے درخواست خارج کردی۔دوسری جانب الیکشن کمیشن نے وفاقی وزیر پرویز ملک کے خلاف انتخابی ضابطہ اخلاق کی خلاف ورزی کی درخواست بھی نمٹا دی۔وفاقی وزیر پرویز ملک کے خلاف درخواست کی سماعت چیف الیکشن کمشنر کی سربراہی میں 5 رکنی بینچ نے کی۔پرویز ملک کے خلاف درخواست دائر کرنے والا درخواست گزار بھی کمیشن میں پیش نہ ہوا تاہم پرویز ملک کے وکیل نے پیش ہوکر کمیشن کو آگاہ کیا کہ ان کے موکل پر سرکاری وسائل کے استعمال کا الزام ہے لیکن اب وہ انتخابی مہم سے دستبردار ہوچکے ہیں جبکہ ان کی جانب سے کسی ترقیاتی فنڈ کا استعمال بھی نہیں کیا گیا۔پرویز ملک کے وکیل نے اپنے موکل کی دستبرداری کا حلف نامہ بھی جمع کرایا جو کمیشن نے تسلیم کرتے ہوئے درخواست خارج کردی۔سماعت کے دوران الیکشن کمیشن نے حکم دیا کہ ضمنی الیکشن میں کسی قسم کی ترقیاتی اسکیم کا اعلان نہیں ہوگا۔
