لاہور( این این آئی)موجودہ سیاسی صورتحال ،آئندہ کے لائحہ عمل اور پارٹی امور بارے حکمران جماعت (ن) لیگ میں وسیع پیمانے پر مشاورت کا سلسلہ جاری ہے ،گزشتہ روز سابق وزیر اعظم محمد نواز اور وزیر اعلیٰ شہباز شریف کے درمیان ماڈل ٹاؤن میں ملاقات ہوئی جس کے بعد جاتی امراء رائے ونڈ میں طویل غیر رسمی مشاورتی اجلاس بھی ہوا ۔ میڈیا رپورٹس
کے مطابق سابق وزیر اعظم محمد نواز شریف اور وزیر اعلیٰ پنجاب محمد شہباز شریف کی ماڈل ٹاؤن میں ملاقات ہوئی جس میں حمزہ شہباز اور سلمان شہباز بھی موجود تھے ۔ملاقات میں موجودہ سیاسی صورتحال ،پارٹی امور اور آئندہ کی حکمت عملی کے حوالے سے تفصیلی تبادلہ خیال کیا گیا ۔ اس موقع پر حلقہ این اے 120کے ضمنی انتخاب بارے بھی گفتگو ہوئی ۔
