اسلام آباد (مانیٹرنگ ڈیسک) وزیراعظم کے ساتھ صدر پاکستان کی بھی تبدیلی، کس کو نیا صدر بنایا جا رہا ہے؟ میڈیا رپورٹس کے مطابق سابق وزیراعظم و پاکستان مسلم لیگ (ن) کے قائد محمد نواز شریف نے نئے وزیراعظم کے انتخاب کے بعد عوام میں جانے کا فیصلہ کر لیا ہے، جس کے لیے نواز شریف نے جلسے جلوسوں کا نیا شیڈول تیار کرنے کا حکم بھی دیا ہے،
اس کے علاوہ نئے وزیراعظم کے ساتھ ساتھ نیا صدر لانے پر بھی غور ہو رہا ہے، میڈیا رپورٹس کے مطابق موجودہ صدر ممنون حسین خرابی صحت کا کہہ کر خود ہی مستعفی ہو جائیں گے،صدر ممنون حسین کی جگہ چوہدری نثار علی خان کو نیا صدر بنانے پر بھی غور کیا جا رہا ہے۔ اس کے علاوہ وزیراعلیٰ شہباز شریف کے صاحبزادے حمزہ شہباز کو شہباز شریف کے صوبائی اسمبلی کے حلقے سے الیکشن لڑوا کر وزارتِ اعلیٰ کے لیے منتخب کروایا جائے گا۔ اسی طرح پنجاب میں عبوری وزیر اعلیٰ کے لیے رانا ثناء اللہ، راجہ اشفاق سرور اور مجتبیٰ شجاع الرحمن کے ناموں پر غور کیا جا رہاہے۔ نئے عبوری وزیراعظم کی کابینہ میں وزارت داخلہ اور وزارت خزانہ کا قلمدان نئے چہرے سنبھالیں گے جبکہ باقی وزارتوں پر وہی پرانے لوگ ہی کام جاری رکھیں گے۔ ذرائع کا یہ بھی کہنا ہے کہ مسلم لیگ (ن) نوازشریف کی نااہلی کے بعد اپنے مخالفین، عدلیہ اور بعض اداروں کو کھلم کھلا نشانے پر رکھے گی۔ ذرائع نے دعویٰ کیا ہیکہ گزشتہ روز ہونے والے مسلم لیگ (ن) کے پارلیمانی پارٹی اور مشاورتی اجلاس میں یہ تمام اہم فیصلے کر لیے گئے ہیں۔
