اسلام آباد (این این آئی)تحریک انصاف کے سربراہ عمران خان نے کہا ہے کہ جے آئی ٹی کی رپورٹ کے بعد میچ ختم ہوگیا ہے ٗ شریف خاندان کا نام ای سی ایل میں ڈالا جائے ٗچھوٹے اور بڑے گاڈ فادر کے پاس مستعفی ہونے کے سوا کوئی چارہ نہیں ٗ اب دیکھنا ہے یہ کس دن وزیر اعظم ہاؤس چھوڑتے ہیں ٗ ہمیں اسٹریٹ موومنٹ کی ضرورت نہیں پڑے گی ٗ جشن ہوگا۔

پیر کو میڈیا سے گفتگو عمران خان نے کہا کہ جو جو ہمارے خدشات تھے سب سچ ثابت ہوگئے ٗ ساری چیزیں جو میں کہہ رہا تھا سامنے آگئی ہیں ٗ اب تو سارے پکڑے جائیں گے،چھوٹے اور بڑے گاڈ فادر کے پاس مستعفی ہونے کے سوا کوئی چارہ نہیں ۔انہوں نے کہا کہ گیم ختم ہوگیا ٗاب دیکھنا یہ ہے کہ انہوں نے کس دن وزیراعظم ہاؤس چھوڑناہے ،انہوں نے اپنی چوری چھپانے کیلئے اداروں سے غلط کام کرائے اور ان کی ساکھ خراب کی ۔ عمران خان نے کہا کہ وزیراعظم اور حکومتی وزرا نے انصاف کے راستے میں رکاوٹیں ڈالیں جبکہ ایف آئی اے اور آئی بی سمیت دیگر اداروں کو اپنے حق میں استعمال کیا گیا اور سپریم کورٹ میں آئی بی کا کردار بھی سامنے آگیا، چیئرمین ایس ای سی پی پر مقدمہ درج کرنے کاحکم دیا گیا۔عمران خان نے کہا کہ تصدیق ہوگئی کہ مریم نواز مے فیئر فلیٹس کی اصل مالکہ تھیں اس کا مطلب نواز شریف کا پیسہ تھا اس نے باہر بھیجا اور مریم کے نام پر فلیٹ خریدے ۔انہوں نے کہا کہ نئی نئی چیزیں سامنے آرہی ہیں ٗنوازشریف بھی دبئی کی ایک آف شور کمپنی کے مالک نکل آئے ہیں ٗنیا پاکستان عمارتوں اور میٹرو سے نہیں عدل وانصاف سے بنتا ہے۔عمران خان نے کہا کہ پاناما کا معاملہ آنے کے بعد اسپیکر اسمبلی نے ان کے بجائے میرے خلاف الیکشن کمیشن میں ریفرنس بھیجا ٗاستعفیٰ تو ایاز صادق کو بھی دینا چاہیے۔انہوں نے کہا کہ نوازشریف ،شہباز شریف اور اسحاق ڈار کے بچے اربوں پتی ہیں ٗنواز شریف کا نام جو گاڈ فادر رکھا ہے وہ بالکل ٹھیک ہے ۔

چیئرمین پی ٹی آئی نے کہا کہ شریف خاندان نے اپنی چوری چھپانے اور ہمیں بلیک میل کرنے کیلئے ہمارے خلاف مقدمات دائر کروائے اور اپنے وزیروں کے ذریعے میرے خاندان والوں کو بدنام کیا جن کا سیاست سے کوئی تعلق ہی نہیں جبکہ میں تو صرف بطور اپوزیشن لیڈر اپنا فرض ادا کررہا تھا لیکن شریف خاندان کا یہی طریقہ واردات ہے جو یہ پچھلے 30 سال سے ملک کو لوٹتے آرہے ہیں۔پی ٹی آئی سربراہ نے کہا کہ ہمیں اسٹریٹ موومنٹ کی ضرورت نہیں پڑے گی بلکہ جشن ہوگا۔