اسلام آباد (مانیٹرنگ ڈیسک)حسین نواز کا دورہ دوحہ۔ قطری شہزادے نے 5 گھنٹے طویل انتظار کروانے کے بعد ملاقات سے معذرت کر لی۔ تفصیلات کے مطابق جیسے جیسے پاناما کیس میں جے آئی ٹی اپنی 60؍ روزہ تحقیقات مکمل کرنے کے قریب پہنچ رہی ہے ویسے ہی یہ سوال اہمیت اختیار کرتا جا رہا ہے کہ جس کردار پر شریف خاندان کا پورا کیس انحصار کر رہا ہے

وہ تفتیش کاروں کے روبرو پیش ہو کر اپنا بیان ریکارڈ کرائیں گے۔موقر قومی روزنامے کی رپورٹ کے مطابق بظاہر شریف خاندان کی جانب سے قطری شہزادے حمد بن جاسم کو منانے کی آخری کوشش کے طور پر وزیراعظم کے بڑے صاحبزادے حسین نواز جمعرات کو قطر کے دارالحکومت دوحہ پہنچے لیکن ان کی ملاقات قطری شہزادے سے نہ ہو سکی۔شریف خاندان کے ایک قریبی ذریعے نے اس نمائندے سے خصوصی بات چیت کرتے ہوئے بتایا کہ حسین نواز تقریباً 6؍ گھنٹے تک دوحہ میں رہے، انہوں نے اہم دوستوں سے ملاقات کی لیکن قطری شہزادے سے ملاقات نہیں کی۔ ایسا لگتا ہے کہ شریف خاندان وہ اہم شواہد حاصل کرنا چاہتا تھا جو پاکستان میں پاناما کیس میں ان کی قسمت کا حتمی فیصلہ کر سکتے ہیں۔شریف خاندان کے وکلا نے سپریم کورٹ کے روبرو یکے بعد دیگرے دو خطوط پیش کیے تھے جن میں لندن میں متنازع جائیدادوں کی خریداری کا ثبوت پیش کرنے کی کوشش کی گئی۔ذریعے نے بتایا کہ ہماری بات چیت کے وقت (رات 8؍ بجے) حسین نوازقطری شہزادے سے ملاقات نہ ہونے پر مایوس ہو کر لندن کیلئے روانہ ہو چکے ہیں، غالب امکان ہے کہ وہ اتوار کو پاکستان پہنچ جائیں گے۔

موضوعات:قطری شہزادہ