اسلام آباد (آئی این پی) پاکستان تحریک انصاف پنجاب سے پیپلز پارٹی کی مزید 2اہم وکٹیں گرانے میں کامیاب ہو گئی،پیپلز پارٹی کے سابق وفاقی وزیر نذر محمد گوندل او پیپلز پارٹی وسطی پنجاب کے جنرل سیکرٹری ندیم افضل چن کے قریبی عزیز5جون کو باضابطہ طور پر پاکستان تحریک انصاف میں شمولیت اختیار کریں گے،
سابق وزیر اعظم یوسف رضا گیلانی کے مشیر نوابزدہ غضنفر گل کی بیک ڈور پاکستان مسلم لیگ (ن)میں شمولیت کیلئے بات چیت جاری ہے ۔ذرائع کے مطابق پیپلز پارٹی کی سابق وفاقی وزیر فردوس عاشق اعوان کے بعد پی ٹی آئی پیپلز پارٹی کی پنجاب سے مزید 2وکٹیں گرانے میں کامیاب ہو گئی ہے،ذرائع کے مطابق پیپلزپارٹی کے سابق وفاقی وزیر نذر محمد گوندل کے پاکستان تحریک انصاف کے ساتھ معاملات طے پا گئے ہیں اور وہ5جون کو پاکستان تحریک انصاف میں باضابطہ طورپر شمولیت اختیار کریں گے ۔واضح رہے کہ نذ رمحمد گوندل کے بھائی ظفرگوندل ای اوبی آئی کرپشن سکینڈل میں گرفتار رہے ہیں اور ابھی لاہور ہائیکورٹ سے ضمانت پر رہا ہیں ۔ ذرائع کے مطابق سرگودھا سے پیپلزپارٹی کے سابق رکن پنجاب اسمبلی اور پیپلزپارٹی وسطی پنجاب کے سیکرٹری جنرل ندیم افضل چن کے قریبی عزیز کے بھی تحریک انصاف کے ساتھ معاملات طے پاگئے ہیں اور وہ بھی نذر محمد گوندل کے ہمراہ پاکستان تحریک انصاف میں شمولیت اختیار کریں گے ۔
