اسلام آباد (مانیٹرنگ ڈیسک)ڈان لیکس معاملے پر حکومت اور عسکری قیادت کے مابین ڈیڈ لاک ختم ہو گیا ہے۔میڈیا رپورٹس کے مطابق ذرائع کا کہنا ہے کہ سول اور عسکری قیادت میں بیک ڈور رابطوں کے نتیجے میں ڈان لیکس رپورٹ کے بعد جاری ہونے والے ایگزیکٹو آرڈر کے نتیجے میں پیدا ہونے والا ڈیڈ لاک ختم ہو گیا ہے جبکہ وزیراعظم نواز شریف اور وزیر داخلہ چوہدری نثار کے درمیان اہم ملاقات بھی ہوئی ہے۔ ملاقات میں ڈان لیکس کی انکوائری رپورٹ پر جاری
ایگزیکٹو آرڈر پر نظر ثانی کے بعد ڈان لیکس سے متعلق نئے نوٹیفکیشن جاری کیے جانے کا امکان ظاہر کیا جا رہا ہے۔ واضح رہے کہ ڈان لیکس کی انکوائری رپورٹ پر وزیر اعظم نواز شریف نے طارق فاطمی اور راؤ تحسین کو عہدوں سے ہٹانے کے احکامات جاری کیے تھے جس پر ڈی جی آئی ایس پی آر میجر جنرل آصف غفور نے مائیکروبلاگنگ ویب سائٹ ٹویٹر پر اپنے پیغام میں حکومتی احکامات کو مسترد کر دیا تھا۔
