گوادر(آئی این پی)وزیراعظم محمد نوازشریف نے محفوظ عدالتی فیصلے پر قیاس آرائی ، تبصرہ یا پیش بینی کرنے سے دوٹوک انکارکردیا انہوں نے کہا ہے کہ محفوظ عدالتی فیصلے پر قیاس آرائی ، تبصرہ یا پیش بینی عدالتی احترام میں خلل کے متراد ف ہے ، ہماری تمام ترتوجہ تعمیروترقی کے منصوبوں پر مرکوز ہے۔ بدھ کو وزیراعظم نے گوادر میں میڈیا نمائندوں سے غیر رسمی گفتگو کرتے ہوئے کہا کہ عدالتی فیصلے پر قیاس آرائی
اور تبصرہ یا پیش بینی کرنا عدالتی احترام میں خلل ہے ، ہماری تمام تر توجہ تعمیر وترقی کے منصوبوں پر مرکوز ہے۔ وزیراعظم نے پسنی سے گوادر تک 150کلومیٹر بذریعہ سڑک سفر کیا اور سڑک کی تعمیر کے معیار کی تعریف کی اور کہا کہ گوادر کو ریلوے کے نیٹ ورک سے ملانے کیلئے گوادر سے کوئٹہ تک نئی ریلوے لائن بچھائی جائے گی۔ گوادر کی ترقی کے لئے 25ارب روپے کے ماسٹر پلان کی منظوری دے دی ہے۔
