اسلام آباد(آئی این پی)پاکستان نے بھارتی ہائی کمشنر گوتم بمبا والے کو دفترخارجہ طلب کر کے ایل او سی پر مسلسل بلااشتعال فائرنگ اور جنگ بندی کی خلاف ورزی پر شدید احتجاج کیا ہے۔ جمعرات کو ترجما ن دفتر خارجہ نفیس زکریا کے مطابق بھارتی ہائی کمشنر کو دفتر خارجہ طلب کر کے ایل او سی پر مسلسل بلااشتعال فائرنگ اور جنگ بندی کی خلاف ورزی پر احتجاج کیا گیا۔

سیکرٹری خارجہ اعزاز چوہدری نے شاہکوٹ اور جورا سیکٹر میں گولہ باری کی شدید مذمت کرتے ہوئے کہا کہ بھارت دونوں ملکوں کے درمیان کشیدگی بڑھارہا ہے، بھارتی فوج نے 13سال بعد ایل او سی پر توپ خانہ استعمال کیا ، ایسے واقعات کشیدگی میں اضافے اور علاقائی امن واستحکام کیلئے خطر ے کا باعث بن سکتے ہیں۔انہوں نے کہا کہ بھارت 2003 کے جنگ بندی کے معاہدے پر عملدرآمد یقینی بنائے،

وہ ایل او سی پر2003 کے سیزفائرمعاہدے،عالمی قوانین کی خلاف ورزیاں کررہا ہے۔ بھارت ایل او سی اور ورکنگ با?نڈری پر جنگ بندی کی خلاف ورزی کی تحقیقات کرے۔ انھوں نے کہاکہ بھارت لائن آف کنٹرول پر معصوم شہریوں پر بلا اشتعال فائرنگ کررہا ہے، دو ماہ میں بھارتی جارحیت سے 26شہری شہید اور 107زخمی ہوئے۔ ہم اقوام متحدہ کے فوجی مبصر مشن کے ساتھ مکمل تعاون کر رہے ہیں،بھارت بھی اقوام متحدہ کے مبصر مشن کو ایل او سی اور ورکنگ باونڈری تک رسائی دے۔