اسلام آباد(مانیٹرنگ ڈیسک )سانحہ صفورا میں ایک اہم اور بڑی پیش رفت ۔سانحہ صفورا میں ملوث انتہائی مطلوب ملزم حاجی بلوچ کا سراغ مل گیا۔ نائن الیون حملوں کے مرکزی ملزم خالد شیخ محمد کا بھتیجا بلوچستان میں موجود ہے۔تحقیقاتی حکام کو سب سے زیادہ مطلوب حاجی بلوچ کی اہم معلومات مل گئیں۔ایک نجی ٹی وی کےذرائع کے مطابق انتہائی مطلوب عبدالقادر عرف انور عرف حاجی بلوچ جو یوسف رمزی کا بھائی اور خالد شیخ محمد کا بھیتجا ہے، اِن دنوں سخت بیمار ہے۔انٹیلی جنس رپورٹ کے مطابق گردوں کے مرض میں مبتلا حاجی بلوچ علاج کرانے کی کوششوں میں ہے لیکن سیکیورٹی اداروں کی سخت نگرانی کی وجہ سے بلوچستان کے علاقے وڈھ سے نہیں نکل پا رہا۔بھارتی ایجنٹ کلبھوشن پہلے ہی حاجی بلوچ سے رابطوں کا انکشاف کرچکا ہے، حاجی بلوچ پچھلے سال مئی میں سانحہ صفورا سمیت دہشت گردی کے بڑے واقعات میں مطلوب ہے۔واضح رہے کہ 13 مئی سال 2015 کو اسماعیلی برادری کی بس الاظہر گارڈنز سے منزل کی جانب رواں دواں تھی کہ صفوار گوٹھ کے قریب ملسح دہشت گردوں نے بس میں چڑھ کر اندھا دھند فائرنگ کرکے 43 افراد کو قتل کردیا تھاجبکہ 13افراد اس حملے میں شدیدزخمی ہوئے تھے ۔