اسلام آباد(مانیٹرنگ ڈیسک) پاکستان کے سیکیورٹی اداروں نے صوبہ بلوچستان میں افغان سرحدی علاقے پنجپائی میں بھاری مقدار میں دھماکا خیز مواد اور اسلحہ برآمد کرکے دہشت گردی کا بڑا منصوبہ ناکام بنادیا۔ فرنٹیئر کور کے حکام کا کہنا تھا کہ ہر آئی ای ڈی کا وزن 20 کلو گرام تھا۔فرنٹئیر کور (ایف سی) کے ترجمان خان واسع نے بتایا کہ سیکیورٹی فورسز نے نولہ کے علاقے میں آپریشن کیا جہاں سے 1800 کلو گرام دھماکا خیز مواد، 150 دیسی ساختہ بم (آئی ڈی ای) اور بڑی مقدار میں دیگر اسلحہ برآمد ہوا۔ان کا کہنا تھا کہ دہشت گرد اسلحہ اور دھماکا خیز مواد بلوچستان میں دہشت گردی کی کارروائیوں میں استعمال کرنا چاہتے تھے۔انہوں نے مزید بتایا کہ سیکیورٹی اہلکاروں نے مذکورہ کارروائی خفیہ اطلاع پر کی تھی تاہم کوئی گرفتاری عمل میں نہیں آئی۔بعد ازاں دھماکا خیز مواد کو ناکارہ بنانے کیلئے بم ڈسپوزل اسکورڈ کو طلب کیا گیا۔