کراچی(مانیٹرنگ ڈیسک)ایم کیو ایم کے اہم ترین رہنما مصطفی کمال کی پارٹی میں شامل،رکن قومی اسمبلی آصف حسنین نے پاک سرزمین پارٹی میں شمولیت کا اعلان کرتے ہوئے کہا ہے کہ آج سے میرا ایم کیو ایم سے کوئی تعلق نہیں ہے۔ جو مینڈیٹ مجھے الطاف حسین سے ملا، وہ میں چھوڑنے کا اعلان کرتا ہوں۔آصف حسنین نے کہا کہ 22 اگست ملکی تاریخ کا سیاہ ترین دن تھا۔ پاکستان مخالف نعروں کے بعد ایم کیو ایم میں رہنے کا کوئی جواز باقی نہیں رہ گیا تھا۔ انہوں نے کہا کہ کے میں نے مصطفیٰ کمال کو پی ایس پی میں شمولیت کیلئے خود فون کیا۔ مصطفیٰ کمال کو کہہ دیا تھا کہ، بس اب بہت ہو گیا۔ میں اب ایم کیو ایم میں مزید نہیں رہ سکتا۔ مصطفیٰ کمال کا اس موقع پر پریس کانفرنس سے خطاب میں کہنا تھا کہ وہ آصف حسنین کو پی ایس پی میں شمولیت پر خوش آمدید کہتے ہیں۔ ان کا کہنا تھا کہ آصف حسین ایم کیو ایم کے بانی کے نام پر ملنے والا مینڈیٹ چھوڑ کر آئے ہیں۔ ایم کیو ایم کے دیگر رہنماءصرف ایم کیو ایم کے بانی سے لاتعلقی کا اعلان نہ کریں بلکہ ان کے مینڈیٹ کو بھی لات ماریں۔