نیو یارک (مانیٹرنگ ڈیسک ) اقوام متحدہ کے سیکریٹری جنرل بانکی مون نے وزیراعظم نواز شریف کے خط کا جواب دے دیا جس میں انہوں نے کہا کہ کشمیر میں نہتے عوام کی ہلاکتیں قابل مذمت ہیں ، تشدد روکنے کی کوششیں کی جائیں۔اقوام متحدہ کے سیکریٹری جنرل بان کی مون کا کہنا ہے کہ پاکستان اور بھارت میں مسائل مذاکرات سے ہی حل ہوسکتے ہیں۔بان کی مون کا کہنا تھا کہ اقوام متحدہ مسئلہ کشمیر پر خدمات فراہم کرنے کے لئے تیار ہے، انھوں نے مزید کہا کہ پاکستان کی علاقائی امن کے لئے کوششیں قابل ستائش ہیں اور اقوام متحدہ کی جنرل اسمبلی کے اجلاس کے دوران وزیراعظم نواز شریف سے ملاقات کا منتظر ہوں۔
واضح رہے کہ وزیر اعظم نواز شریف نے اقوام متحدہ کے سیکریٹری جنرل بان کی مون کو خط لکھ کر مقبوضہ کشمیر میں فورسز کے مظالم رکوانے کے لیے کردار ادا کرنے کا مطالبہ کیا تھا۔اقوام متحدہ کے سیکریٹری جنرل کو لکھے گئے خط میں وزیر اعظم کی جانب سے مقبوضہ کشمیر میں انسانی حقوق کی خلاف ورزیاں بند کرانے کے لیے کردار ادا کرنے کا مطالبہ کرتے ہوئے کہا گیا تھا کہ کشمیریوں کے حق خود ارادیت پر سلامتی کونسل کی قراردادوں کے مطابق عمل کیا جائے۔ واضح رہے کہ مقبوضہ کشمیر میں کئی روز سے جاری کشیدگی میں 81 سے زائد افراد شہید ہو چکے ہیں۔ بھارتی ذرائع کے مطابق دوسری طرف اقوام متحدہ کے بیان پر بھارت نے تشویش کا اظہار کیا ہے ۔