اسلام آباد (مانیٹرنگ ڈیسک )صدر ممنون حسین نے کہا ہے کہ دہشت گردی کے خلاف جنگ میں قوم پاک فوج کے شانہ بشانہ ہے، دیدہ اورنادیدہ دشمنوں کو بھاگنے نہیں دیا جائے گا، شہدا کے خون کا پورا حساب لیا جائے گا، پاکستان اپنے کشمیری بھائیوں کی عالمی سطح پر حمایت جاری رکھے گا۔ جناح کنونشن سینٹر اسلام آباد میں جشن آزادی کی مرکزی تقریب ہوئی۔ تقریب میں صدرمملکت ممنون حسین، وزیراعظم نواز شریف، آرمی چیف جنرل راحیل شریف، ایئر چیف اور نیول چیف، اسپیکر قومی اسمبلی ایاز صادق اور ملک کی ممتاز شخصیات نے شرکت کی ۔ صدر ممنون حسین نے یوم آزادی پر پرچم کشائی کی مرکزی تقریب سے خطاب میں پوری قوم کو آزادی کی مبارکباد دی۔ صدر مملکت نے کہا کہ آپریشن ضرب عضب آخری مراحل میں ہے۔ یقین ہے کہ آخری کاری ضرب لگا کردہشت گردوں کا ہمیشہ کے لئے خاتمہ کردیں گے۔مسلح افواج اورقانون نافذ کرنے والے اداروں نے جان پر کھیل کر ملک کا دفاع کیا ہے۔
صدر نے کہا کہ دشمن کی چال کو سمجھتے ہوئے ٹھنڈے دل سے کام لیا جائے اوراختلافات کو ہوا دینے سے گریز کیا جائے۔ صدر نے کہا کہ ہمیں یوم آزادی پر کشمیری بھائیوں کو نہیں بھولنا چاہیے۔ پاکستان مسئلہ کشمیر کا حل اقوام متحدہ کی قراردادوں کیمطابق چاہتا ہے۔ کشمیری بھائیوں کی اخلاقی سفارتی حمایت جاری رکھیں گے۔ صدر کا کہنا تھا کہ ملک کی ترقی اور استحکام کا راز جمہوریت میں پوشیدہ ہے۔ اقتصادی استحکام اور بدامنی کے خاتمے کیلئے قومی ایجنڈے پر کام کرناہوگا۔ قومی زندگی میں ہر سطح پر قانون کی حکمرانی یقینی بنایا جائے۔ صدر نے کہا کہ سانحہ کوئٹہ کے غمزدہ خاندان اپنے آپ کو تنہا نہ سمجھیں۔ سانحہ پر ہمارے دل دکھی ہیں۔ کوئٹہ کے شہدا کا خون ہم پر قرض ہے۔ شہدا کے خون کا پورا حساب لیا جائے گا۔ جناح کنونش اسلام آباد میں ہونے والی تقریب میں ملی نغمے بھی پیش کیئے گئے جبکہ وزیراعظم نے تقریب میں موجود بچوں سے ہاتھ ملایا اورتصویریں بنوائیں۔