کراچی( آ ن لائن) وزیراعلیٰ سندھ مراد علی شاہ نے جشن آزادی کی مناسبت سے تمام سرکاری افسران کو ہدایت کی ہے کہ وہ اپنے زیر استعمال گاڑیوں پرقومی پرچم آویزاں کریں بصورت دیگر ان کے خلاف کارروائی کی جائے گی۔میڈیا رپورٹس کے مطابق وزیراعلی مرادعلی شاہ نے تمام سرکاری افسران کو گاڑیوں پرقومی پرچم لگانے کی ہدایت کی ہے اور اس کے ساتھ ہی انہیں متنبہہ بھی کیا گیا ہے کہ گاڑی پرقومی پرچم نہ لگانے والے افسران اور عملے کے خلاف کارروائی بھی کی جائے گی۔دوسری جانب مراد علی شاہ نے سی ایم ہاؤس میں تعینات افسران اورملازمین کو اپنی گاڑی وزیراعلیٰ ہاؤس کے اندر پارک کرنے پر پابندی عائد کردی ہے۔ جس کے بعد وزیراعلی کے سیکرٹری، ڈپٹی سیکرٹری اور ڈی ایس اسٹاف تک کی گاڑیاں باہر پارک میں کھڑی کی گئیں۔واضح رہے کہ وزیراعلی سندھ نے دو روز قبل گاڑی پر قومی پرچم نہ لگانے والے ایک سرکاری افسر کو اس کی گاڑی سے اتار دیا تھا۔