اسلام آباد(مانیٹرنگ ڈیسک ) وفاقی دارالحکومت میں خود کش حملوں کی اطلاعات ملنے کے بعد اہم پبلک مقامات پر سکیورٹی میں اضافہ کردیا گیا ہے ، دہشتگرد شاپنگ سنٹر اور اہم تنصیبات کو نشانہ بنا سکتے ہیں۔ وفاقی پولیس نے سینٹورس مال سمیت تمام اہم شاپنگ سنٹر کی سکیورٹی میں تین گنا اضافہ کردیا ہے۔ مصدقہ ذرائع کے مطابق سکیورٹی اداروں کو ایسی اطلاعات موصول ہوئی ہیں جن کے مطابق خود کش حملہ آور پبلک مقامات پر حملہ کرنے کا ارادہ رکھتے ہیں ان میں سب سے زیادہ حساس سینٹورس شاپنگ سنٹر کو قرار دیا گیا ہے۔ وفاقی پولیس نے ایک ایس پی آفیسر کی سربراہی میں ساٹھ کے قریب اہلکار اور افسران وہاں تعینات کردیئے ہیں اس شاپنگ مال کی تین شفٹوں میں سکیورٹی کیلئے ایک ایس پی کے ساتھ ایک ڈی ایس پی ، ایک انسپکٹر دس اے ایس آئی اور سب انسپکٹر جبکہ 45پولیس کے جوان تعینات کئے گئے ہیں اس کے علاوہ سپیشل برانچ کے اہلکار بھی سکیورٹی ڈیوٹی پر مامور کردیئے گئے ہیں اور رینجرز کے دستے بھی ڈیوٹی دینگے۔
وفاقی پولیس کے ایک اعلیٰ عہدیدار نے آن لائن کو بتایا ہے کہ موصولہ اطلاعات کے مطابق تین سے چار دہشتگرد دہشتگردی کرسکتے ہیں اور ان کا زیادہ تر ٹارگٹ پبلک مقامات ہیں اس لئے سب سے زیادہ ڈیوٹی شاپنگ مال اور تفریحی پارکس میں لگائی گئی ہیں اور پولیس کا گشت بھی بڑھا دیا گیا ہے جبکہ آئی جی اسلام آباد خود تمام سکیورٹی اقدامات کو چیک کررہے ہیں اس لئے میں عوام سے بھی کہا گیا ہے کہ اپنے اردگرد نظر رکھیں اور کسی بھی مشکوک شخص یا کسی مشکوک چیز کو دیکھتے ہیں تو پولیس کو اطلاع کریں مزید یہ کہ پولیس ناکوں پر چیکنگ میں بھی اضافہ کردیا گیا ہے گو کہ اس سے عوام کو تکلیف اٹھانی پڑتی ہے لیکن سکیورٹی کیلئے یہ بہت ضروری ہے ۔