اسلام آباد(مانیٹرنگ ڈیسک )موثرمانیٹرنگ اوردونوں اطراف غیرقانونی نقل و حمل روکنے کے لیے پاکستان نے افغانستان کیساتھ سرحدپر تعمیر کیے گئے نئے گیٹ کا یکم اگست کو افتتاح کرنے کا فیصلہ کرلیا ہے ،گیٹ پر افغانستان کے اعتراض کی وجہ سے گزشتہ ہفتوں دونوں ممالک کے درمیان کشیدگی بھی پائی گئی تھی جس میں پاک فوج کے میجر جوادعلی چنگیزی شہید ہوگئے تھے جبکہ کئی افرادزخمی ہوئے تھے،بارڈرمنیجمنٹ اور سیکیورٹی سے متعلق معاملات پر تبادلہ خیال کیلئے دونوں ممالک کے اعلیٰ ملٹری حکام اور سویلین قیادت کی ملاقات آج کابل میں ہوگی،میجر جنرل عابد نصیر نے بتایا کہ کسٹم ، ایف آئی اے اور دیگر متعلقہ اداروں کے حکام کی معاونت کیلئے سی سی ٹی وی کیمرے اور سکینرز نصب کردیئے گئے ہیں، نادرا، ایف آئی اے، کسٹمز اور دیگر ادارے نہایت متحرک ہیں، سرحد کراسنگ کے لیے سفری دستاویزات لازمی قراردیے دی گئی ہیں ،گیٹ کی تعمیر سے غیر قانونی نقل و حمل پر قابو پایا جاسکے گا ،طورخم گیٹ کے گرد باڑ لگا دی گئی ہے اور دونوں ملکوں کے درمیان بات چیت کا عمل بھی جاری ہے جبکہ امریکی حکام جلد پاکستان کا دورہ کر یں گے جس سے معاملات طے پائے جائیں گے ۔