اسلام آباد(آئی این پی) وفاقی وزیر داخلہ چوہدری نثار کے بغیر وزیر اعلیٰ پنجاب میاں شہباز شریف کی آرمی چیف جنرل راحیل شریف سے ملاقات میڈیا اور اہم حلقوں میں زیر بحث رہی او را س پر مختلف قسم کے تبصرے کئے جا رہے ہیں۔ تفصیلات کے مطابق وزیر اعلیٰ پنجاب شہباز شریف کی جن کی گزشتہ روز آرمی چیف جنرل راحیل شریف سے اہم ملاقات ہوئی تھی ماضی میں ہمیشہ وزیر داخلہ چوہدری نثار علی خان کے ہمراہ ہی وزیر اعلیٰ پنجاب آرمی چیف سے ملاقاتیں کر تے رہے ہیں اور یہ پہلا موقع تھا جب وزیر اعلیٰ کی آرمی چیف سے ملاقات ون آن ون ملاقات ہوئی ہے۔ جس پر میڈیا اور اہم حلقوں میں مختلف قسم کے تبصرے کئے جا رہے ہیں کہ وزیر داخلہ کے بغیر وزیر اعلیٰ کو آرمی چیف سے ملاقات کی ضرورت کیوں محسوس ہوئی اور اس میں کون سا اہم معاملہ زیر بحث لایا گیا ہے جبکہ بعض سرکاری ذرائع کے مطابق وزیر اعلیٰ پنجاب سے ملاقات سے قبل وزیر داخلہ سے ملاقات کی تھی او راس ملاقات کے بعد بھی چوہدری نثار علی خان کو آرمی چیف سے ہونے والی بات چیت پر اعتماد میں لیا ہے۔