اسلام آباد (مانیٹرنگ ڈیسک) وفاقی وزیر خزانہ سینیٹر اسحاق ڈار نے قومی اسمبلی میں قائد حزب اختلاف سید خورشید شاہ سے ملاقات کی جس میں الیکشن کمیشن ارکان کی تقرری کیلئے مشاورت کی گئی اور خورشید شاہ نے اسحاق ڈار سے وزیراعظم کی خیریت بھی دریافت کی۔ نجی ٹی وی کے مطابق منگل کو اسحاق ڈار نے سید خورشید شاہ سے ملاقات کی۔ ملاقات میں ملکی سیاسی صورتحال اور الیکشن کمیشن ارکان کی تقرری کیلئے مشاورت کی گئی اس موقع پر سینیٹر اسحاق ڈار نے کہا کہ الیکشن کمیشن ارکان کی تقرری کیلئے 45 دن کا ٹائم ہوتا ہے جو 25 جولائی کو ختم ہوتا ہے۔ خورشید شاہ نے کہا کہ اپوزیشن جماعتوں سے مشاورت جاری ہے۔ جمعرات یا جمعہ کو دوبارہ ملیں گے اور مشاورت سے ارکان کی تقرری کا عمل مکمل کیا جائے گا۔ ملاقات میں سید خورشید شاہ نے اسحاق ڈار سے وزیراعظم کی خیریت دریافت کی جس پر اسحاق ڈار نے جواب دیا کہ نواز شریف کی طبعیت بہتر ہے اور انہوں نے دفتری امور نمٹانے شروع کردیئے ہیں۔ (ن غ)