اسلام آباد(مانیٹرنگ ڈیسک) پاکستان تحریک انصاف کے سربراہ اور شوکت خانم کینسر ہسپتال کے چیئرمین عمران خان نے معروف سماجی کارکن و عظیم انسان عبدالستار ایدھی کی وفات کے بعد 26 سال پرانا راز بتا ہی دیا۔ عمران خان نے پاکستان کی عظیم ترین شخصیت معروف عالمی سماجی کارکن کے حوالے سے گفتگو کرتے ہوئے کہا کہ آج تک کسی کو یہ معلوم نہیں تھا کہ شوکت خانم کینسر ہسپتال کیلئے پہلا چندہ کس عظیم شخصیت نے دیا؟ عمران خان نے کہا 26 سال قبل مجھے عبد الستار ایدھی نے شوکت خانم ہسپتال کیلئے پہلا چندہ دیا تھا اور مجھے وہ دن نہیں بھولتا جب انہوں نے اس ہسپتال کی بنیادمیں اہم ترین کردار ادا کیا۔
عمران خان نے کہا کہ مجھے خدمت خلق کا شوق اور لگن عبد الستار ایدھی کو دیکھ کر ہوئی، ایدھی نے نہ صرف یتیم، مسکین، غریب و لاوارث لوگوں کی مالی امداد کی بلکہ بہت سے لوگوں کو خدمت خلق کرنے کیلئے متاثر کیا، ان میں سے ایک میں بھی ہوں۔ عبد الستار ایدھی کی وفات سے انسانیت کی خدمت کا ایک روشن باب بند ہو گیا۔