کراچی(مانیٹرنگ ڈیسک) عظیم انسان عبد الستار ایدھی کو جس قبر میں دفن کیا جائے گا وہ 25 سال پرانی ہے جسے انہوں نے خود ایدھی ویلیج میں 25 سال قبل تیار کروایا تھا عبدالستار ایدھی کی وصیت کے مطابق انہیں ایدھی ویلیج میں دفن کیا جائے گا جہاں انہوں نے 25 سال پہلے اپنی قبرخود بنوائی تھی۔ عبدالستار ایدھی نے وصیت کی تھی کہ اگر ان کے جسمانی اعضاء عطیہ کئے جا سکتے ہوں تو کر دیئے جائیں۔ ان کی عمر زیادہ ہونے کی وجہ سے صرف آنکھیں عطیہ کی جا سکتی ہیں جس کا آپریشن کر دیا گیا۔ عبدالستار ایدھی نے یہ بھی وصیت کی کہ انہیں ایدھی ویلیج میں دفن کیا جائے۔ انہوں نے وصیت کی تھی کہ انہیں کفن کی بجائے ایدھی فاؤنڈیشن کے لباس میں ہی دفن کیا جائے۔ فیصل ایدھی کا کہنا ہے کہ عبدالستار ایدھی نے 25 سال قبل ایدھی ویلج میں اپنی قبر تیار کرائی تھی اور ان کی تدفین وہیں ہو گی۔ ایدھی نے اپنی آنکھیں عطیہ کر دی ہیں۔
صدی کے عظیم ترین انسان عبد الستار ایدھی کے آخری الفاظ بھی ان کی خدمت انسانیت کے جذبے کو عیاں کرتے ہیں۔ عبد الستار ایدھی گزشتہ شب 11 بجے کے قریب خالق حقیقی سے جا ملے تھے اور اپنے انتقال سے قبل جو الفاظ انہوں نے کہے وہ سن کر درد دل رکھنے والا ہر انسان اشکبار ہو گیا۔ تفصیل کے مطابق عالمی شہرت یافتہ سماجی کارکن عبد الستار ایدھی نے بستر مرگ پر وفات سے قبل اہلخانہ کو مخاطب کرتے ہوئے کہا تھا کہ ’’میرے ملک کے غریبوں کا خیال رکھنا‘‘ ۔