اسلام آباد(مانیٹرنگ ڈیسک)نجی ٹی وی پروگرام میں سینئر تجزیہ نگار نے حیران کن دعویٰ کر دیا، سینئر تجزیہ نگار نے کہا کہ پاکستان مسلم لیگ (ن) اور پاکستان پیپلز پارٹی دونوں کے لوگ یہ کہہ رہے ہیں کہ ایک نیا این آر او آ رہا ہے جس پر پس پردہ بات کی جا رہی ہے۔ سینئر صحافی صابر شاکر نے کہا کہ امریکی وفد پاکستان آیا اور ملاقاتیں کرکے بہت اچھا پیغام لے کر چلا گیا ہے۔ این آر او کی بات اس لئے کی جا رہی ہیں کہ تمام اسٹیک ہولڈر اپنی اپنی جگہ قائم رہیں۔
سینئر تجزیہ نگار سمیع ابراہیم نے کہا کہ انڈین لابی یہ مشہور کر رہی ہے کہ پاکستانی فوج کی طرف سے ضرب عضب میں کی جانے والی کارروائیوں میں چند مخصوص لوگوں کو بچایا جا رہا ہے۔ پاکستانی فوج ان کے خلاف کارروائیاں نہیں کر رہی ۔ سمیع ابراہیم نے کہا کہ نواز حکومت کے بہت سے لوگ بھی آف دی ریکارڈ یہی باتیں کہتے ہیں۔ امریکی وفد اسلئے بھجوایا گیا تھا کہ وہ پاکستان آکر جمہوریت کے حق میں بیان دیں ۔ وفد یہ دیکھنے آیا تھا کہ پاکستانی فوج کے بارے میں جو باتیں کی جارہی ہیں ان میں کتنی حقیقت و صداقت ہے؟
سمیع ابراہیم نے کہا کہ انڈین لابی پوری کوشش کر رہی ہے کہ نواز شریف کو کسی طرح این آ ر او ملے اور وہ اپنی حکومت کو جاری رکھیں کیونکہ ایک کمزور ترین جمہوری سیت اپ انڈیا کیلئے بہت مناسب ہے اور انڈیا کو لگتا ہے کہ نواز حکومت سے وہ فائدے میں رہیں گے۔ سمیع ابراہیم نے کہا کہ امریکہ کے اندر ایک بہت بڑی فیلنگ ہے جس میں پاکستانی فوج کو بھی نظر انداز نہیں کیا جا سکتا۔ امریکی یہ سمجھتے ہیں کہ پاکستانی فوج ان کے بڑے کام آ سکتی ہے اسلئے وہ نواز شریف کے پلڑے میں سارا وزن نہیں ڈالیں گے البتہ انڈین لابی نواز حکومت کے استحکام کیلئے پوری کوششیں کر رہی ہیں۔