لاہور (مانیٹرنگ ڈیسک) الیکشن کمیشن کے ممبران کی تقرریوں کے لئے لاہور ہائیکورٹ میں آئینی درخواست دائر کر دی گئی۔ درخواست میں استدعا کی گئی ہے کہ عدالت الیکشن کمیشن کے ممبران کی تعیناتیوں کے احکامات صادر کرے۔ درخواست محمد اشفاق چوہدری ایڈووکیٹ کی جانب سے دائر کی گئی درخواست میں کہا گیا ہے کہ آئین کے آرٹیکل دو سو پندرہ کے تحت اراکین کے عہدوں کی معیاد انیس جون کو ختم ہو چکی ہے، تاہم معیاد کے خاتمے کے باوجود الیکشن کمیشن کے نئے اراکین کی نامزدگیوں کے عمل کا آغاز نہیں کیا گیا ہے جو آئین پاکستان کی واضح خلاف ورزی ہے۔ درخواست میں کہا گیا ہے کہ الیکشن کمیشن کا ادارہ خود مختار اور بااختیار ہے جس کے عہدوں پر نئی تعیناتیاں آئین کا تقاضا ہے۔ درخواست میں استدعا کی گئی ہے کہ عدالت چیف الیکشن کمشنر اور الیکشن کمیشن کے دیگر ممبران کی تعیناتیوں کے احکامات صادر کرے۔