اسلام آباد (این این آئی) نادرا کی طرف سے ملک بھر میں شناختی کارڈز کی از سر نو تصدیق کا عمل جمعہ سے شرو ع ہوگیا ٗ تصدیق کیلئے تین نکاتی اصولوں کو مد نظر رکھا جائے گا۔ساڑھے دس کروڑ رجسٹرڈ عوام کے شناختی کارڈز کی ازسر نو تصدیق کا عمل شروع ہو گیا ، سب سے پہلے جعلی شناختی کارڈز بنانے والوں کو 31 اگست تک کی ڈیڈ لائن دے دی گئی ہے ٗ اس دوران جن افراد نے تسلیم کرلیا کہ انہوں نے پاکستان کے جعلی شناختی کارڈ بنوائے ہیں انہیں مہاجر تسلیم کرلیا جائے گا۔نجی ٹی وی کے مطابق31 اگست کے بعد جعلی شناختی کارڈ کے ساتھ پکڑے گئے غیر ملکیوں کو ان کے ملک واپس بھیج دیا جائیگا۔شناختی کارڈز کی ازسرنو تصدیق کے لیے عوام سیموبائل فون پیغامات کے ذریعے رابطہ کیا جائیگا۔نادرا کی طرف سے شہریوں کو اپنے موبائل نمبر سے فون نمبر 8008 پر اپنا شناختی کارڈ نمبر ارسال کرنے کو کہا گیا ہے ٗاس فون نمبر پر شناختی کارڈ رکھنے والے نادرا کے پاس درج اپنے خاندان کے بارے میں جان سکیں گے۔اگر نادرا ریکارڈ میں متعلقہ خاندان میں کوئی غیر شخص شامل ہے تو 8008سے پیغام کے جواب میں 1لکھنے کی ہدایت کی گئی ٗ جعلی شناختی کارڈ ز کے حامل افراد کو پکڑوانے والوں کیلئے دس ہزار روپے کے انعام کا اعلان بھی کیا گیا ہے۔نادرا ہیڈ کوارٹرز میں خصوصی ڈائریکٹوریٹ کے ذریعے وفاقی دارالحکومت اسلام آباد اور چاروں صوبوں سمیت آٹھ ریجنز میں شناختی کارڈز کی ازسر نو تصدیق کا عمل شروع کردیا گیا ٗنادرا نے عوام کی آگاہی کے حوالے سے میڈیا مہم کیلئے بھی 13کروڑ روپے کی رقم مختص کی ۔