اسلام آباد (آئی این پی) وزیراعظم نواز شریف نے پاکستان میں رجسٹرڈ افغان مہاجرین کے قیام کی مدت میں 6ماہ کی توسیع کی منظوری دے دی، رجسٹرڈ افغان مہاجرین اب 31دسمبر 2016 تک پاکستان میں قیام کر سکیں گے۔ بدھ کو ترجمان وزیر اعظم ہاؤس کے مطابق وزیراعظم نواز شریف نے رجسٹرڈ افغان مہاجرین کے قیام میں 6ماہ کی توسیع کی منظوری دے دی، وزیراعظم نے وزارت سیفران کو افغان مہاجرین کی واپسی کا معاملہ یو این ایچ سی آر اور افغان حکام سے اٹھانے کی ہدایت کرتے ہوئے کہا کہ جذبہ خیرسگالی کے تحت افغانستان میں بننے والے مہاجر کیمپوں میں گندم مہیا کی جائے گی۔ترجمان کے مطابق افغانستان میں مہاجر کیمپوں کیلئے تین سال تک بلا معاوضہ گندم فراہم کی جائے گی، مہاجر کیمپوں میں گندم خاندان کے افراد کی تعداد کے مطابق فراہم کی جائے گی۔ ترجمان کے مطابق وزیراعظم نواز شریف نے افغان مہاجرین کی واپسی کے حوالے سے وزارت سرحدی امور کو ہدایات بھی دیں۔