اسلام آباد (مانیٹرنگ ڈیسک)آپریشن ضرب عضب میں متاثر ہونے والے 49ہزار743خاندان واپس اپنے علاقوں میں پہنچ گئے ۔واپس جانے والے خاندانوں میں 25ہزار روپے بذریعہ اے ٹی ایم کارڈ ٗ 10ہزار روپے ٹرانسپورٹ کی مد میں ادا کئے جا رہے ہیں ۔ فاٹا ڈیزاسٹر مینجمنٹ اتھارٹی کے مطابق پاک فوج کی جانب سے دہشتگردوں کے خلاف جاری آپریشن ضرب عضب میں متاثر ہونے والے شمالی وزیرستان کے بے گھر افراد آئی ڈی پیز کی واپسی کا سلسلہ جاری ہے ٗ اب تک 49ہزار 743خاندان واپس اپنے آبائی علاقوں میں پہنچ گئے ہیں ٗ 54ہزار خاندانوں کی واپسی ابھی باقی ہے ۔ حکام کے مطابق واپس جانے والے خاندانوں میں 25ہزار روپے بذریعہ زونگ موبائل سم کے ذریعہ ادا کئے جا رہے ہیں ۔ واپس جانے والے خاندانوں میں ورلڈ فوڈ پروگرام کے ذریعہ چھ ماہ کیلئے مفت راشن ، کمبل اور خیمے دیئے جا رہے ہیں ۔ حکام کے مطابق شمالی وزیرستان کے تمام بے گھر افراد دسمبر2016ء تک اپنے علاقوں میں واپس پہنچ جائیں گے ۔