اسلام آباد (مانیٹرنگ ڈیسک) وفاقی وزیر خزانہ اسحاق ڈار نے وفاقی وزیر برائے مذہبی امور سردار یوسف کوجھاڑ پلا دی‘ وفاقی وزیرمذہبی امور سردار یوسف نے اسمبلی اجلاس کے دوران نماز کا وقفہ کرانے کی کوشش کی جس پر وفاقی وزیر خزانہ اسحاق ڈار غصہ ہو گئے،سینیٹر اسحاق ڈار نے کہا کہ جس نے نماز پڑھنی ہے جاکر پڑھ آئے، وقفہ سے کورم پورا نہیں ہوگا اور بحث مکمل نہیں ہوگی۔قومی اسمبلی کے اجلاس کے دوران ظہر کی اذان کے بعد سپیکر اسمبلی سردار ایاز صادق نے نماز کا وقفہ نہیں کیا تو وفاقی وزیر برائے مذہبی امور سردر یوسف اپنی نشست سے کھڑے ہو گئے اور نماز کیلئے وقفہ کرانے کی کوشش کی ۔سپیکر قومی اسمبلی ایاز صادق نے اشاروں میں سردار یوسف کو سمجھانے کی کوشش کی۔ اس دوران وزیر خزانہ اسحاق ڈار سردار یوسف کی نشست کی طرف آئے اور غصہ سے ان کو کہا کہ آپ ایسا کیوں کررہے ہیں اگر وقفہ کیا تو کورم بعد میں پورا نہیں ہوگا جس نے نماز پڑھنی ہے وہ جاکر پڑھ آئے۔ آپ بھی جاکر نماز پڑھ آئیں۔ اسحاق ڈار کے اس جواب پر وزیر مذہبی امور مطمئن نظر نہیں آئے ۔