اسلام آباد(این این آئی)پاکستان پیپلزپارٹی پارلیمنٹرینز کے صدر اور سابق صدر پاکستان آصف علی زرداری نے معروف قوال امجد صابری کے قتل کی شدید مذمت کرتے ہوئے مطالبہ کیا ہے کہ اس جرم کے تمام ذمہ داروں بشمول قاتلوں کو گرفتار کیا جائے اور انہیں قانون کے مطابق سخت ترین سزا دی جائے۔ امجد صابری کو بدھ کے روز کراچی میں ٹارگٹ کرکے شہید کر دیا گیا۔ آصف علی زرداری نے اپنے تعزیتی پیغام میں کہا ہے کہ صرف دو روز قبل سندھ ہائی کورٹ کے چیف جسٹس کے صاحبزادے کا اغوا اور آج امجد صابری کی ٹارگٹ کلنگ یہ ظاہر کرتے ہیں کہ دہشتگرد اور ان کے حمایتی اور پشت پناہی کرنے والے ابھی تک متحرک ہیں۔ انہوں نے صوبائی حکومت سے کہا ہے کہ وہ دہشتگردی کی کارروائیوں میں تیزی کی وجوہات جاننے کی پوری کوشش کرے اور کیا یہ عسکریت پسندوں اور ان کی پشت پناہی کرنے والوں کی جانب سے کسی بڑی سازش کا حصہ تو نہیں ہے؟ آصف علی زرداری نے امجد صابری کی روح کے ایصال ثواب اور غمزدہ خاندان کیلئے صبر جمیل کی دعا بھی کی۔