اسلام آباد (مانیٹرنگ ڈیسک )وزیر داخلہ چوہدری نثار علی خان نے ا فغانستان کی طرف سے پاکستانی سیکورٹی فورسز پر بلاجواز فائرنگ کے واقعات پر ردعمل کا اظہار کرتے ہوئے کہا ہے کہ لگتا ہے کہ ہمارا ہمسایہ ملک کسی اور کے ہاتھوں میں کھیل رہا ہے۔پاکستان کی باڈر مینجمنٹ اور دونوں اطراف سے در اندازی روکنے کی مخلصانہ کوششوں کو سرحد پار سے سبو تاژ کیا جا رہا ہے۔ منگل کو ایک بیان میں انہوں نے کہا کہ سرحد کی دوسری جانب سے بلا جواز اور بے معنی گولہ باری سے میجر جواد سمیت ہمارے سیکیورٹی اہلکاروں کی شہادت ناقابل برداشت ہے انہوں نے کہا کہ افغانستان کو یہ فیصلہ کرنا پڑے گا کہ وہ خطے میں امن کے لیے ہماری کوششوں کا ساتھ دینا چاہتا ہے یا کسی اور کا کھیل کھیلنا چاہتا ہے۔