اسلام آباد(مانیٹرنگ ڈیسک) جمعیت علمائے اسلام (ف) کے سینیٹر حافظ حمد اللہ اور معروف سماجی کارکن ماروی سرمد کے درمیان تلخ کلامی، پاکستان تحریک انصاف کی مرکزی رہنما شیریں مزاری پارلیمنٹ میں اپنی تضحیک کا معاملہ بھول گئیں اور ماروی سرمد کی حمایت میں بڑا اعلان کر دیا۔ شیریں مزاری نے قومی اسمبلی اجلاس سے خطاب کرتے ہوئے کہا کہ جمعیت علمائے اسلام (ف) کے سینیٹر حافظ حمد اللہ کا ماروی سرمد کے ساتھ سلوک انتہائی نا مناسب اور ہتک آمیز ہے، شیریں مزاری کا کہنا تھا کہ وہ اس سلوک پر سراپا احتجاج ہیں، انہوں نے کہا کہ ملک بھر میں خواتین کو نشانہ بنایا جا رہا ہے‘ اس کی روک تھام کرنا ہوگی۔
شیریں مزاری نے کہا کہ قانون ساز ادارے اس معاملے پر نوٹس لیں، خواتین کیخلاف تشدد ہو رہا ہے اس پر کارروائی ہونی چاہئے، شیریں مزاری کی تقریر کے جواب میں سپیکر قومی اسمبلی نے کہا کہ خواتین جہاں بھی ہوں وہ انتہائی قابل احترام ہیں۔ شیریں مزاری نے کہا کہ اگر ان معاملات پر نوٹس نہ لیا گیا تو وہ اب احتجاج کر رہی ہیں اور آئندہ بھی شدید احتجاج کریں گی۔