اسلام آباد(آئی این پی)وزیر اعظم کے معاون خصوصی طارق فاطمی نے کہا ہے کہ ہم نے امریکی وفد پر واضح کیا ہے کہ بلوچستان میں ڈرون حملے کا کوئی جواز نہیں ہے ،اگر امریکہ نے دوبارہ ہمارے ملک کی حدود میں ڈرون حملہ کیا تو دونوں ملکوں کے تعلقات پر بہت زیادہ منفی اثر پڑے گا۔جمعہ کو نجی ٹی وی کے پروگرام میں گفتگو کرتے ہوئے طارق فاطمی نے کہا کہ ہم نے امریکی وفد پر واضح کیا ہے کہ بلوچستان میں ڈرون حملے کا کوئی جواز نہیں ہے،امن مذاکرات پر ڈرون حملے کے منفی اثرات پڑیں گے ۔انہوں نے کہا کہ امریکہ کی جانب سے دوبارہ اس طرح کی کاروائی ہوئی تو تعلقات پر منفی اثرات پڑیں گے،امریکی حکام نے آپریشن ضرب عضب میں ہماری کامیابیوں کو تسلیم کیا ہے اور پاک افواج کی دہشت گردوں کے خلاف دلیرانہ کاروائیوں کو سراہا ہے ۔