لاہور ( این این آئی) لاہور میں والٹن ائیرپورٹ پر تربیتی طیارہ گر گیا ،پائلٹ اور معاون پائلٹ دونوں محفوظ رہے ، طیارے کی خرابی کے حوالے سے انکوائری شروع کر دی گئی ۔تفصیلات کے مطابق نصیرآباد کے علاقے میں والٹن ائیرپورٹ پرتربیتی طیارہ گرنے کا واقعہ پیش آیا ہے۔ابتدائی معلومات کے مطابق تربیتی طیارہ اپنی پرواز مکمل کر کے واپس آیا تو لینڈنگ کے دوران توازن بگڑنے کے باعث رن وے پر گر گیا۔ حادثے کے نتیجے میں طیارے میں سوار پائلٹ اور معاون پائلٹ محفوظ رہے تاہم انہیں معمولی خراشیں آئیں جس پر انہیں طبی امداد دے دی گئی ۔ طیارے کا رجسٹریشن نمبر اے پی زیڈ ایم اے بتایا جاتا ہے ۔ گرنے کے باعث طیارے کو جزوی نقصان پہنچا ۔طیارے کی خرابی کے حوالے سے انکوائری شروع کر دی گئی ہے ۔واضح رہے کہ اس سے قبل بھی والٹن ائیرپورٹ پر ایک تربیتی طیارہ گر گیا تھا جس کے نتیجے میں اس میں سوار خاتون پائلٹ ہلاک ہو گئی تھیں۔